Peter Sorensen, i dërguari i posaçëm i Bashkimit Evropian për dialogun mes Kosovës dhe Serbisë, do vizitojë Prishtinën të mërkurën, më 14 janar, dhe Beogradin të enjten, më 15 janar. Kjo është konfirmuar nga Shërbimi Evropian i Veprimit të Jashtëm (EEAS).
Gjatë vizitës, Sorensen pritet të zhvillojë takime me udhëheqësit e të dyja shteteve. Në Kosovë, është planifikuar gjithashtu një takim me përfaqësuesit e partive opozitare.
Kjo është vizita e parë e Sorensenit qëkur iu vazhdua mandati për dy vjet të tjera si i dërguar për normalizimin e marrëdhënieve ndërmjet dy vendeve. Gjatë mandatit të parë, ai zhvilloi vetëm dy takime në nivel kryenegociatorësh, të cilat nuk dhanë fryt. Mungesa e përparimit iu atribuua kryesisht zhvillimeve të brendshme politike në Kosovë dhe Serbi, e jo mungesës së angazhimit të ndërmjetësit evropian.
Vizita vjen në prag të formimit të qeverisë së re në Kosovë, pas zgjedhjeve të jashtëzakonshme të 28 dhjetorit, të cilat i fitoi bindshëm Lëvizja Vetëvendosje, partia e kryeministrit në detyrë Albin Kurti. Brukseli pret që ky zhvillim të ringjallë procesin e dialogut, mbase me një takim në nivelin më të lartë politik.
Përfaqësuesja e Lartë e BE-së për Politikë të Jashtme dhe Siguri, Kaja Kallas, ende nuk ka ndërmjetësuar ndonjë rundë dialogu në nivel të lartë. Vonesat lidhen me ngërçin politik në Kosovë gjatë vitit 2025 dhe protestat e studentëve në Serbi që nga vjeshta e 2024-s. Bashkimi Evropian vlerëson se kushtet janë pjekur pas fitores së Lëvizjes Vetëvendosje për përpjekje të reja në Ballkanin Perëndimor.