Delina Ibrahimaj, ministre e Ekonomisë dhe Inovacionit, mori pjesë në Konferencën e Ballkanit Perëndimor “Avancimi i Përbashkët i Politikave të Punësimit dhe Politikave Sociale”, të organizuar më 11 maj në Berlin nga Ministria Federale Gjermane e Punës dhe Çështjeve Sociale (BMAS), në kuadër të Procesit të Berlinit.
Konferenca shënoi lançimin zyrtar të Planit të Përbashkët të Punës për Punësimin dhe Politikat Sociale për vendet e Ballkanit Perëndimor (WB6). Ky dokument dyvjeçar synon forcimin e bashkëpunimit rajonal, avancimin e reformave të tregut të punës dhe përafrimin me standardet e Bashkimit Europian.
Ministrja Ibrahimaj ishte pjesë e Panelit I me temë “Nxitja e punësimit: strategji efektive për tregje pune të qëndrueshme dhe gjithëpërfshirëse”. Ajo ndau prioritetet e Shqipërisë në fushën e punësimit, zhvillimit të aftësive dhe modernizimit të politikave aktive të tregut të punës.
Në fjalën e saj, Ibrahimaj theksoi rëndësinë e përputhjes së aftësive me nevojat e tregut të punës, rritjen e aksesit në programe trajnimi dhe ndërmjetësimi, si dhe forcimin e efikasitetit të shërbimeve publike të punësimit. Ajo vuri në dukje rëndësinë e përfshirjes së të rinjve, grave dhe grupeve vulnerabël përmes instrumenteve të dedikuara dhe masave që reduktojnë barrierat.
Ministrja nënvizoi rolin e inovacionit dhe digjitalizimit në modernizimin e politikave të punësimit, rritjen e konkurrueshmërisë dhe ofrimin e shërbimeve më aksesueshme për qytetarët dhe bizneset. Gjithashtu, ajo evidentoi forcimin e Inspektoratit të Punës, standardeve të sigurisë dhe shëndetit në punë, përmes kapaciteteve institucionale, digjitalizimit të inspektimeve dhe ndërgjegjësimit mbi të drejtat e punëmarrësve.
Në kuadër të Procesit të Berlinit, Shqipëria rikonfirmoi angazhimin për rol aktiv dhe udhëheqës në avancimin e reformave rajonale.