Ministrja e Ekonomisë dhe Inovacionit, Delina Ibrahimaj, bëri të ditur më 6 nëntor se nga janari 2027 nafta dhe benzina do të kushtojnë mbi 30 lekë më pak për litër.
Sipas Ibrahimajt, ulja do të sjellë kosto më të ulëta për qytetarët, transportuesit, fermerët dhe bizneset, si dhe ndikim pozitiv në çmimet e produkteve. Ajo tha se mbushja e një makine me 50 litra do të kushtojë rreth 1 500 lekë më pak çdo herë.
Ministrja tha gjithashtu se ulja e kostove të transportit dhe prodhimit mund të ndikojë në çmimet e mallrave në dyqane. “Kur transporti kushton më pak, edhe mallrat në dyqan do të kushtojnë më pak, pasi kostot e prodhimit bëhen më të lira”, u shpreh ajo.
Ibrahimaj tha se Bordi i Transparencës do të garantojë që ulja e çmimit të pasqyrohet në çdo pikë karburanti. Sipas saj, ulja do të zbatohet menjëherë dhe do të përcillet në çdo pompë e në çdo qytet.
Ajo përmendi si përfitues edhe personat që përdorin makinën për të shkuar në punë ose për të çuar fëmijët në çerdhe, kopsht apo shkollë, si dhe transportuesit e fermerët.