Delina Ibrahimaj, ministre e Ekonomisë dhe Inovacionit, deklaroi se Shqipëria vijon të konsolidojë politikat mbështetëse për ndërmarrjet e vogla dhe të mesme (SME). Ajo iu referua raportit të Organizatës për Bashkëpunim dhe Zhvillim Ekonomik (OECD) "SME Policy Index 2025", të publikuar më 12 maj.
Sipas këtij raporti, Shqipëria ka shënuar përmirësim pozitiv në 5 nga 12 dimensionet e vlerësimit dhe ka ruajtur performancën në 5 dimensione të tjera. Kjo e rendit vendin ndër ekonomitë lider në Ballkanin Perëndimor dhe Turqia për krijimin e një mjedisi të favorshëm për zhvillimin e SME-ve.
Raporti vlerëson progres të dukshëm veçanërisht në:
- edukimin sipërmarrës dhe mbështetjen për sipërmarrjen e grave;
- tranzicionin e gjelbër dhe mbështetjen ndaj SME-ve drejt një ekonomie të qëndrueshme;
- mjedisin operacional të favorshëm për biznesin;
- mbështetjen mbi standardet dhe rregulloret teknike.
Ky vlerësim konfirmon përkushtimin e institucioneve shqiptare për të forcuar ekosistemin e sipërmarrjes. Prioritetet kryesore janë inovacioni, cilësia dhe qëndrueshmëria si shtylla të zhvillimit ekonomik.