Mëngjesin e kësaj të hëne, një ngjarje e rëndë kriminale është regjistruar në fshatin Shkorrët të bashkisë Mirditë. Viktima, Valter Lleshi, 45 vjeç, është gjetur pa shenja jete brenda automjetit të tij tip Toyota Yaris, përgjatë aksit rrugor Reps–Spaç.
Sipas njoftimit zyrtar, viktima dyshohet se është qëlluar për vdekje me armë zjarri. Ngjarja është konstatuar rreth orës 07:10. Shërbimet e Policisë kanë rrethuar zonën dhe po kryejnë kontrolle intensive për lokalizimin dhe kapjen e autorit ose autorëve.
Aktualisht, është ngritur një grup i posaçëm hetimor, i cili nën drejtimin e Prokurorisë, po punon për fiksimin dhe administrimin e provave në vendin e ngjarjes. Motivet e krimit mbeten ende të paqarta, ndërsa vijojnë veprimet për dokumentimin ligjor të rastit.
Përditësime
Në vendin e ngjarjes janë gjetur 18 gëzhoja. Viktima, e cila u ekzekutua gjatë rrugës për në punë, ka marrë plagë vdekjeprurëse në kokë dhe trup. Autoritetet po hetojnë dyshimet se viktima mund të ketë qenë autor i vrasjes së Anton Kelit në vitin 2020. Gjithashtu, viktima punonte si shofer për një kompani makinerish, e cila u godit nga një sulm me tritol pak muaj më parë.