Inspektorati Kombëtar i Mbrojtjes së Territorit (IKMT) ka nisur prishjen e ndërtimeve pa leje në njësinë administrative të Ksamilit, bashkinë e Sarandës. Aksioni zhvillohet në bashkëpunim me Policinë e Shtetit dhe Inspektoratin e Mbrojtjes së Territorit (IMT) vendore.
Në total parashikohet prishja e 10 objekteve, mes të cilave struktura betonarme, metalike ose druri. Këto janë ndërtuar pa dokumentacionin përkatës dhe në shkelje të ligjit. IKMT bën të ditur se për të gjitha rastet ka ndjekur rrugën ligjore dhe masat administrative të duhura.
Aksioni do të vazhdojë nesër në qytetin e Sarandës. Kreu i IKMT-së, Afrim Qëndro, e ka njoftuar këtë përmes një postimi në rrjetet sociale, duke theksuar synimin për goditjen e paligjshmërisë dhe mbrojtjen e hapësirave publike.
Kjo ndërhyrje vjen dy ditë pas aksionit në Shkodër, ku u prishën 3 objekte të ndërtuara kohët e fundit në kundërshtim me ligjin. Aksionet e IKMT-së synojnë parandalimin e shkeljeve në zonat turistike, veçanërisht në fillim të sezonit.