Analisti politik Ilir Deda ka bërë thirrje për një dakordim të menjëhershëm mes Lëvizjes Vetëvendosje dhe Partisë Demokratike të Kosovës për të shmangur një krizë institucionale në vend. Përmes një reagimi publik, ai vlerësoi se palët duhet të ndërmarrin hapa të përbashkët që do të garantonin sukses për të gjithë aktorët politikë.
Sipas Dedës, nëse nuk arrihet zgjidhje për leximin e dytë të Ligjit për dhomat e specializuara dhe për zgjedhjen e presidentit, Kosova do të përballet me një vakum institucional. Ai paralajmëroi se kjo situatë do të rezultonte në mungesë të ligjit, mungesë të presidentit dhe të ushtruesit të detyrës së presidentit, si dhe mungesë të një strategjie të përbashkët.
Njohësi i çështjeve politike shprehu shqetësimin se dështimi në këtë proces do të dobësonte mundësinë që procesi i Apelit të ketë sukses. Ai theksoi se nuk ekziston asnjë garanci për një sjellje ndryshe të aktorëve politikë pas zgjedhjeve të nëntorit. Deda bëri thirrje që të shmanget dështimi kolektiv, duke nënvizuar se një nga çështjet kryesore mbetet moslejimi i kriminalizimit të luftës së drejtë për liri.