Ish-Presidenti Ilir Meta ka reaguar lidhur me listën e dëshmitarëve të paraqitur nga Prokuroria e Posaçme (SPAK) në Gjykatën e Posaçme kundër Korrupsionit dhe Krimit të Organizuar (GJKKO). Përmes një deklarate në rrjetet sociale, Meta bëri të ditur synimin e mbrojtjes për të kërkuar dëshminë e rreth 100 personave, duke theksuar se procesi do të fokusohet në fakte që, sipas tij, nuk janë hetuar gjatë 8 viteve të fundit.
Në listën e dëshmitarëve të kërkuar nga mbrojtja përfshihen:
• Aksionerë dhe drejtues të kompanisë DIA në Uashington.
• Drejtues të McKeon Group, përfshirë avokatin greko-amerikan Fidetzis.
• Diplomatë dhe zyrtarë amerikanë.
• Përfaqësues të kompanive lobuese që kanë pasur kontrata me LSI.
Lidhur me ish-zyrtarin e FBI-së, Charles McGonigal, Meta deklaroi se për shkak të pamundësisë së këtij të fundit për të qenë i pranishëm fizikisht, mbrojtja do t'i drejtojë pyetje përmes letërporosive.
Ky zhvillim vjen pas seancës ku SPAK paraqiti pretendimet për dosjen e lobimit të LSI-së në Shtetet e Bashkuara dhe çështjen CEZ/DIA. Ilir Meta ndodhet në masën e sigurisë "arrest me burg" që nga 21 tetori 2024, ndërsa ish-bashkëshortja e tij, Monika Kryemadhi, po hetohet nën masën "detyrim paraqitjeje".