Pas përfundimit të tubimit paqësor në bulevardin Dëshmorët e Kombit, një grup protestuesish u zhvendosën përpara Komisariatit nr. 3 të Policisë së Shtetit. Qëllimi i tubimit ishte kërkesa për lirimin e personave të ndaluar pas incidenteve të ndodhura të enjten, gjatë seancës plenare në Kuvendin e Shqipërisë.
Situata u përshkallëzua kur një pjesë e pjesëmarrësve, disa prej të cilëve të maskuar, kryen veprime vandale. Si pasojë, u dëmtuan xhamat dhe orenditë në hollin e godinës së policisë.
Një prej protestuesve u shpreh se dhuna e ushtruar nuk përfaqëson gjithë pjesëmarrësit, duke kërkuar dialog dhe një zgjidhje paqësore. Ai përmendi rastin e një studenti të quajtur Everest, i cili sipas tij është ndaluar bashkë me babanë pa qenë i përfshirë në akte dhune. Gjithashtu, u pretendua se disa prej të ndaluarve nuk kanë pasur lidhje me protestën, pasi janë ndaluar ndërsa ndodheshin në një lokal.