Një person është qëlluar për vdekje të dielën në qytetin Biddeford të Maine, gjatë një operacioni në të cilin ishin të përfshirë agjentë të Shërbimit Amerikan të Emigracionit dhe Doganave (ICE). Ngjarja është konfirmuar nga Ryan Fecteau, kryetar i legjislaturës së shtetit, i cili deklaroi se institucionet përkatëse, përfshirë Policinë e Shtetit dhe Departamentin e Sigurisë Publike, janë angazhuar për mbledhjen e provave.
Hetimi për zbardhjen e rrethanave të ngjarjes pritet të mbështetet edhe nga FBI. Autoritetet vendore kanë kufizuar qarkullimin në zonën ku ndodhi incidenti, ndërsa zyrtarët e ICE dhe të Departamentit të Sigurisë Kombëtare nuk kanë dhënë ende një deklaratë zyrtare për media.
Ngjarja në Maine pason një rast të ngjashëm në Houston, Teksas, ku një shtetas meksikan i identifikuar si Lorenzo Salgado Araujo u qëllua për vdekje nga një agjent federal gjatë një kontrolli rrugor. Sipas ICE, viktima në Teksas ishte pa dokumentacion të rregullt dhe ishte përpjekur t'i shmangej arrestimit. Incidentet e fundit kanë shtuar thirrjet për transparencë lidhur me mënyrën e veprimit të agjencive federale gjatë zbatimit të politikave të emigracionit në Shtetet e Bashkuara.