Një incident zjarri është regjistruar në aeroportin Malpensa të Milanos, në platformën e Terminalit 1, ku një karrocë për transportin e bagazheve mori flakë gjatë procesit të ngarkimit në një avion të British Airways. Ngjarja ndodhi rreth orës 13:00, teksa mjeti në pronësi të kompanisë Aviapartner po përdorej për të dërguar bagazhet drejt avionit me destinacion Londrën.
Sipas raportimeve, zjarrfikësit e aeroportit ndërhynë brenda pak minutash dhe arritën të shuanin flakët, duke i kufizuar ato vetëm te karroca dhe bagazhet, pa shkaktuar dëme në avion apo në strukturat e aeroportit. Nuk raportohet për asnjë person të lënduar. Pavarësisht situatës, aktiviteti në aeroportin e Malpensës vijoi normalisht.
Si pistë kryesore për shkakun e zjarrit po shqyrtohet mbinxehja e një pajisjeje me bateri litiumi që ndodhej brenda një valixheje. Ekspertët theksojnë se temperaturat e larta të regjistruara ditët e fundit mund të kenë favorizuar këtë mbinxehje. Për shkak të kontrolleve të domosdoshme të sigurisë, fluturimi i British Airways (i identifikuar nga disa burime si fluturimi BA585 me avionin Airbus A321neo) u shty me rreth dy orë, duke u nisur me vonesë nga orari i planifikuar.
Ekspertët e sigurisë ajrore paralajmërojnë prej muajsh për rrezikun që paraqesin pajisjet elektronike me bateri litiumi, duke qenë se sistemet e mbrojtjes në hapësirat e bagazheve janë projektuar për të frenuar përhapjen e zjarrit dhe jo për t'i shuar ato plotësisht, çka bën që shumë kompani ajrore të ndalojnë vendosjen e pajisjeve si power bank-et në bagazhet e dorëzuara.
Përditësime
Hetuesit e incidentit të ndodhur në orën 13:00 në Terminalin 1 të aeroportit të Malpensës po shqyrtojnë dy pista kryesore. Krahas mbinxehjes së baterisë së litiumit, ekspertët po verifikojnë mundësinë e një defekti teknik në pajisjet e transportit të bagazheve. Karroca e përfshirë nga flakët rezulton në pronësi të kompanisë së shërbimeve tokësore Aviapartner. Pamjet filmike të siguruara nga vendngjarja konfirmojnë pozicionin e saktë të karrocës gjatë ndërhyrjes së ekipeve të zjarrfikësve.