Një incident ka ndodhur në fshatin Vuno, ku gazetari dhe publicisti Arjan Konomi u përfshi në një përplasje me eskortën dhe truprojat që shoqëronin kryeministrin Edi Rama. Pas ngjarjes, Konomi u shoqërua për disa orë në Komisariatin e Policisë së Himarës.
Sipas versionit të Arjan Konomit, shkaku i përplasjes ishte parkimi i automjeteve të eskortës së kryeministrit në një zonë ku parkimi është i ndaluar, ndërkohë që banorët e Vunoit gjobiteshin nga policia për shkelje të ngjashme. Gazetari pohoi se iu drejtua forcave të policisë për këtë standard të dyfishtë, çka solli thirrjen e tij nga kryeministri Edi Rama për t’u sqaruar. Konomi pretendoi se bashkëshortja e kryeministrit, Linda Rama, u soll në mënyrë agresive, pas së cilës truprojat e shoqëruan atë në komisariat dhe, sipas tij, i fshinë videot nga telefoni.
Nga ana tjetër, kryeministri Edi Rama publikoi një video tjetër të ngjarjes, duke kundërshtuar versionin e gazetarit. Rama e akuzoi Konomin se ka ushtruar bullizëm ndaj bashkëshortes dhe djalit të tij të mitur, Zaho, në praninë e tyre në një lokal në Vuno. Në reagimin e tij, kryeministri theksoi se pamjet dëshmojnë të kundërtën e asaj që pretendoi Konomi, duke e cilësuar rrëfimin e këtij të fundit si një gënjeshtër të ndërtuar për qëllime politike.
Ngjarja është ndjekur edhe nga aktorët politikë. Kreu i lëvizjes “Shqipëria Bëhet”, Adriatik Lapaj, kritikoi shoqërimin e gazetarit duke e cilësuar si një veprim arbitrar, ndërsa pamje të ngjarjes u shpërndanë gjerësisht edhe nga kryetari i Partisë Demokratike, Sali Berisha, i cili dënoi ashpër sjelljen ndaj gazetarit.
Përditësime
Gazetari Arjan Konomi ka sqaruar rrethanat e incidentit, duke deklaruar se përplasja ndodhi pas kthimit të tij nga vjelja e fiqve në zonë. Konomi pranoi se i ofroi kryeministrit Edi Rama fiq gjatë debatit, një detaj që u konfirmua edhe nga pamjet e publikuara nga vetë kryeministri, ku dëgjohet qartë pyetja: 'Do ca fiq?'
Partia Demokratike e cilësoi incidentin në Vuno si një akt hakmarrjeje të kryeministrit Edi Rama ndaj gazetarit Arjan Konomi. Përfaqësuesja e PD-së, Viola Kapidani, deklaroi se shoqërimi i gazetarit nuk është i izoluar, por lidhet me denoncimet e tij të vazhdueshme mbi çështjet e pronave në zonat e Gjipesë dhe Skutarës.