Autoritetet britanike kanë nisur verifikimet lidhur me një incident të raportuar në Kanalin Anglez, ku një fregatë ushtarake ruse, e identifikuar si Admiral Grigorovich, dyshohet se ka lëshuar të shtëna paralajmëruese në drejtim të një jahti civil me flamur britanik. Incidenti ka ndodhur rreth orës 11:40, në një distancë prej afro 457 metrash nga anija civile.
Sipas të dhënave, ngjarja u zhvillua në ujëra ndërkombëtare, rreth 20 milje detare në jug të Ishullit të Wight. Pavarësisht veprimeve të fregatës ruse, nuk ka pasur asnjë pasojë për ekuipazhin e jahtit apo dëmtime të mjetit lundrues. Në momentin e ngjarjes, fregata ruse ishte duke u monitoruar nga anija e Marinës Mbretërore britanike, HMS Mersey.
Ky episod vjen në një periudhë tensionesh të shtuara, pas sekuestrimit nga ana e forcave britanike të cisternës së naftës Smyrtos, e cila dyshohet se i përkiste 'flotës në hije' të Rusisë dhe ndodhej nën regjimin e sanksioneve. Pavarësisht kësaj, burime zyrtare nga Ministria e Mbrojtjes në Londër deklaruan se incidenti po trajtohet si një rast i izoluar dhe aktualisht nuk ka prova që e lidhin atë me sekuestrimin e cisternës së naftës.
Anijet luftarake ruse lundrojnë rregullisht nëpër Kanalin Anglez, duke qenë nën vëzhgimin e vazhdueshëm të marinës britanike, e cila angazhon anije patrullimi si HMS Tyne dhe HMS Mersey për të siguruar monitorimin e zonës.
Përditësime
Ministria Ruse e Mbrojtjes deklaroi se veprimet e anijes së saj ishin në përputhje me rregulloret ndërkombëtare, duke pretenduar se jahti britanik iu afrua në mënyrë të rrezikshme. Nga ana tjetër, autoritetet sqaruan se jahti, i pafuqishëm nga motori, kishte devijuar kursin për shkak të rrymave dhe mjegullës. Pala ruse raportoi se, përpara të shtënave paralajmëruese me pushkë, kishte përdorur komunikimin radio dhe fishekzjarre. Në bordin e jahtit ndodhej një çift 60-vjeçar.