Presidenti i FIFA-s, Gianni Infantino, ka dërguar një telegram urimi për Armand Dukën me rastin e rizgjedhjes së tij në krye të Federatës Shqiptare të Futbollit (FSHF) për një mandat të ri 4-vjeçar.
Rizgjedhja ndodhi paraditen e së hënës, në Asamblenë e Përgjithshme Zgjedhore të FSHF-së. Në telegram, Infantino shpreh urimet më të sinqerta për Dukën dhe anëtarët e zgjedhur të Komitetit Ekzekutiv, duke vlerësuar përkushtimin e tyre në zhvillimin e futbollit dhe promovimin e vlerave të tij në Shqipëri.
Letra e plotë e Gianni Infantinos është si vijon:
I nderuar President,
Ju lutem pranoni përshëndetjet e mia më të përzemërta dhe urimet e mia më të sinqerta për rizgjedhjen tuaj si President i Federatës Shqiptare të Futbollit.
Do t’ju isha mirënjohës nëse do të përcillnit gjithashtu urimet e mia për anëtarët e Komitetit Ekzekutiv të zgjedhur sot, ndërkohë që shfrytëzoj këtë rast për t’ju falënderuar për të gjitha përpjekjet, punën dhe kontributin tuaj të rëndësishëm në zhvillimin e sportit tonë dhe promovimin e vlerave të tij në Shqipëri.
Duke ju dërguar juve dhe ekipit tuaj urimet më të mira për këtë mandat të ri dhe shumë suksese për të gjitha sfidat që ju presin, pres me kënaqësi, i nderuar President, të vazhdojmë të punojmë së bashku për rritjen dhe prosperitetin e futbollit në Shqipëri në vitet që vijnë.
I juaji në futboll,
Gianni Infantino