Inspektorati Qendror i Punës (IQP) ka ndërhyrë duke urdhëruar ndalimin e menjëhershëm të punimeve në një objekt në ndërtim në rrugën "Elez Berisha" në Fushë Kosovë, përballë objektit të kolegjit AAB. Vendimi erdhi pas një inspektimi që konstatoi kushte të papërshtatshme, të cilat rrezikonin drejtpërdrejt sigurinë dhe shëndetin e punëtorëve, si dhe të kalimtarëve.
Gjatë kontrollit në terren, inspektorët evidentuan këto mangësi teknike:
• Mungesën e mbyllësve anësorë mbrojtës të skelave.
• Mungesën e fiksimit (ankorimit) të duhur të skelave.
• Praninë e hapësirave të pambrojtura në strukturën e objektit.
Si pasojë e këtyre shkeljeve të legjislacionit për sigurinë në punë, inspektorët vendosën shiritin zyrtar të ndalimit në vendpunishte. IQP-ja bëri të ditur se do të vazhdojë monitorimin dhe ndërmarrjen e masave ligjore ndaj të gjitha subjekteve që shpërfillin standardet e sigurisë, duke theksuar përkushtimin për zbatimin e rregullave në fuqi.