Inspektori i Lartë i Drejtësisë, Artur Metani, po zhvillon një vizitë pune në Uashington D.C., ku është pritur nga përfaqësues të lartë të institucioneve amerikane. Në kuadër të këtij udhëtimi, Metani zhvilloi një takim në Departamentin e Shtetit me Amy Carnie, drejtore e Zyrës për Evropën Perëndimore dhe Qendrore.
Nëpërmjet një deklarate të bërë publike në rrjetin social X, Metani e vlerësoi takimin si shumë të frytshëm. Ai theksoi se gjatë bashkëbisedimit është rikonfirmuar mbështetja për reformimin e sistemit të drejtësisë në Shqipëri. Fokus kryesor i diskutimeve ishte forcimi i llogaridhënies dhe përgjegjshmërisë brenda sistemit gjyqësor shqiptar, si dhe konsolidimi i parimeve të integritetit institucional.
Vizita e Artur Metanit në Shtetet e Bashkuara të Amerikës zhvillohet në kuadër të kontakteve të vazhdueshme me institucionet partnere, me qëllim avancimin e shtetit të së drejtës dhe forcimin e institucioneve të drejtësisë në vend.