Sipas të dhënave të INSTAT për tremujorin e parë të vitit 2026, tregu i punës në Shqipëri ka vijuar trendin rritës të pagave, si pasojë e nevojës së bizneseve për të adresuar mungesën e fuqisë punëtore.
Paga mediane bruto, e cila shërben si treguesi më i saktë për standardin real të jetesës, arriti në 74,010 lekë, duke shënuar një rritje vjetore prej 19%. Kjo shifër konfirmon se 50% e punonjësve në vend marrin një pagë neto më të ulët se 60,000 lekë në muaj, ndërsa gjysma tjetër paguhet mbi këtë nivel. Rritja më e fortë u regjistrua në tremujorin e parë, me një shtesë prej 11.2% krahasuar me fundin e vitit 2025, si efekt i ndryshimeve në pagën minimale.
Nga ana tjetër, paga mesatare bruto u rrit me 9.6% krahasuar me një vit më parë, duke arritur në 90,119 lekë. Diferenca mes pagës mesatare dhe asaj mediane është ngushtuar në 18%, pasi pagat e niveleve të ulëta dhe të mesme janë rritur më shpejt se pagat e larta, të cilat zakonisht zhvendosin treguesin e mesatares.
Ekspertët e ekonomisë vlerësojnë se niveli i të ardhurave të kësaj pjese të popullsisë paraqet sfidë për fuqinë blerëse. Aftësia për të përballuar koston e jetesës varet kryesisht nga shpenzimet fikse, si qiraja, veçanërisht në tregun e shtrenjtuar të Tiranës.