Komanda e kontingjentit grek në misionin paqeruajtës të NATO-s në Kosovë, KFOR, iu dorëzua majorit Ioannis Tzonis gjatë një ceremonie në kampin “Film City” në Prishtinë. Në ceremoni ishte i pranishëm komandanti i KFOR-it, gjeneralmajor Roberto Vergori.
Sipas njoftimit të KFOR-it, ceremoninë e drejtoi zëvendëskomandanti i misionit, gjeneral brigade Onur Çakıcı. Gjatë saj, majori Athanasios Papoutsis ia dorëzoi komandën majorit Tzonis, duke përmbyllur mandatin e tij në krye të kontingjentit grek.
Çakıcı vlerësoi profesionalizmin dhe kontributin e Papoutsisit dhe të pjesëtarëve grekë në misionin e NATO-s, veçanërisht në ruajtjen e një mjedisi të sigurt për qytetarët e Kosovës. Ai mirëpriti komandantin e ri dhe riafirmoi përkushtimin e vazhdueshëm të KFOR-it ndaj të gjitha komuniteteve që jetojnë në Kosovë.
KFOR-i ritheksoi se vazhdon të zbatojë mandatin në përputhje me Rezolutën 1244 të Këshillit të Sigurimit të Kombeve të Bashkuara, të vitit 1999, për të kontribuar në ruajtjen e sigurisë dhe lirisë së lëvizjes.
Misioni i NATO-s tha se vepron në mënyrë të paanshme dhe në bashkërendim të ngushtë me Policinë e Kosovës dhe Misionin e Bashkimit Evropian për Sundimin e Ligjit (EULEX), në përputhje me përgjegjësitë përkatëse të tyre në fushën e sigurisë.