Irani ka njoftuar zyrtarisht mbylljen e Ngushticës së Hormuzit, një prej korridoreve më strategjike për transportin global të naftës dhe gazit natyror. Vendimi është bërë i ditur nga Shtatmadhoria e Forcave të Armatosura të Iranit dhe agjencia e lajmeve Mehr, duke e cilësuar këtë lëvizje si përgjigje ndaj asaj që Teherani e konsideron mungesë mirëbesimi dhe shkelje të marrëveshjes së armëpushimit nga Shtetet e Bashkuara dhe Izraeli.
Sipas deklaratave ushtarake, ky vendim ndërmerret pas sulmeve izraelite në Liban dhe veprimeve të cilat Teherani i cilëson si shkelje të memorandumit të mirëkuptimit. Autoritetet iraniane kanë paralajmëruar se kjo masë është vetëm fillimi i reagimit të tyre dhe se mund të ndërmerren hapa të tjerë, në varësi të zhvillimeve në terren.
Ngushtica e Hormuzit mbetet një nyje jetike për ekonominë botërore, pasi përmes saj kalon një pjesë thelbësore e eksporteve globale të energjisë. Analistët vlerësojnë se çdo kufizim në këtë zonë ka potencialin të shkaktojë luhatje të menjëhershme në çmimet e karburanteve dhe të krijojë pasiguri në tregjet ndërkombëtare. Deri në këto çaste, nuk ka një reagim zyrtar nga Uashingtoni ose Tel Avivi në lidhje me këtë zhvillim.
Përditësime
Shtetet e Bashkuara dhe Irani kanë nënshkruar një marrëveshje 14-pikëshe për armëpushim, me një afat 60-ditor për finalizimin e kushteve. Megjithatë, Komanda Qendrore Ushtarake 'Khatam-al Anbiya' dhe Garda Revolucionare (IRGC) kanë paralajmëruar se do të ndërmarrin masa operacionale ndaj çdo anijeje që i afrohet Ngushticës së Hormuzit, duke shënuar një përshkallëzim të ri të tensioneve në rajon.
Marina e Gardës Revolucionare të Iranit (IRGC) njoftoi pezullimin e lundrimit në Ngushticën e Hormuzit deri në një njoftim të dytë. Autoritetet e Shteteve të Bashkuara e kanë mohuar këtë mbyllje, duke konfirmuar se trafiku tregtar vijon normalisht. Paralelisht, qeveria e Izraelit ka njoftuar ndërprerjen e operacioneve ushtarake në Liban.
Agjencia e lajmeve Fars raportoi se Marina e Gardës Revolucionare të Iranit ka vendosur të ndalojë kalimin e anijeve nëpër Ngushticën e Hormuzit. Ky vendim përshkallëzon tensionet diplomatike mes Iranit dhe Shteteve të Bashkuara të Amerikës, duke e bërë kontrollin e trafikut detar çështjen kryesore të përplasjes mes dy palëve.
• Zëvendëspresidenti amerikan JD Vance deklaroi për Fox News se nuk ka prova për mbylljen e Ngushticës së Hormuzit, duke hedhur poshtë pretendimet e mëparshme.
• Sulmet ajrore të Izraelit në Liban shkaktuan të paktën 10 të vdekur, pak orë pas hyrjes në fuqi të marrëveshjes për armëpushim.