Bisedimet e mundshme midis SHBA-së dhe Iranit në Islamabad të Pakistanit rrethohen nga paqartësi.
Sipas SHBA-së, delegacioni i saj, i udhëhequr nga të dërguarit e Donald Trump, Steve Witkoff dhe Jared Kushner, pritet të mbërrijë sot në kryeqytetin pakistanez.
Ministri i Jashtëm i Iranit, Abbas Araghchi, ndodhet tashmë në Islamabad, por pala iraniane mohon se vizita synon negociata të drejtpërdrejta me amerikanët. Ai e cilëson udhëtimin si pjesë të një turi rajonal me tre ndalesa dhe ka takuar kreun e forcave të armatosura të Pakistanit, Asim Munir. Pas kësaj, Araghchi do të udhëtojë drejt Omanit dhe Rusias për konsultime mbi zhvillimet rajonale.
Pala iraniane ka paraqitur kërkesat dhe shqetësimet te ndërmjetësit pakistanezë në lidhje me propozimet amerikane. Irani insiston që SHBA të vendosë fundin e bllokadës së Ngushticës së Hormuzit si kusht paraprak për raundin e dytë të negociatave.
Në të njëjtën kohë, administrata amerikane ka ngrirë 344 milionë dollarë në kriptovaluta të lidhura me Iranin. Sekretari i Thesarit Scott Bessent deklaroi në platformën X se po monitorojnë përpjekjet e Teheranit për të nxjerrë fondet dhe po synojnë linjat e financimit të regjimit. Qëllimi është të godasin aftësinë e Iranit për të gjeneruar, lëvizur dhe rikthyer fonde.