Irani sulmoi me dronë pikat strategjike në Oman, kryesisht rafineritë e naftës, pas sulmeve ndaj Emirateve të Bashkuara Arabe. Sulmet ndodhën në kontekstin e tensionimeve në Gjirin Persik pas mbylljes së Ngushticës së Hormuzit.
Emiratet Arabe raportuan se katër dronë u nisën nga Irani drejt territorit të tyre. Tre u rrëzuan mbi ujërat territoriale, ndërsa i katërti ra në det, pa goditur asnjë objektiv. Pak më vonë shpërtheu një zjarr i madh në uzinën e naftës Fujairah, ku u plagosën tre indianë me gjendje të qëndrueshme shëndetësore.
Të hënën pasdite, sirenat e alarmit u aktivizuan tre herë në Dubai, duke u kërkuar banorëve të qëndronin në zona të sigurta. Pas orës 17:00, mijëra qytetarë morën alarme urgjente në telefonat celularë. Ministria e Mbrojtjes e UAE konfirmoi se tingujt e dëgjuar ishin rezultat i rrëzimit të suksesshëm të dronëve dhe u bëri thirrje publikut të informohet nga burimet zyrtare dhe të zbatojë masat e sigurisë.
Sulmet vijnë disa orë pas nisjes së Operacionit Liria, një iniciative e Donald Trump për të larguar anijet e bllokuara në Gjirin Persik. Trump njoftoi se operacioni kryhej në konsultim me Iranin, i cili mohoi çdo përfshirje. Një zyrtar i lartë iranian postoi një mesazh ku shkruante: "mesazhi ka arritur në destinacionin e tij. Ne do t’u tregojmë shenja të tilla sa këmbët e tyre do të dridhen dhe harta e iluzioneve do të ndryshojë".
Si pasojë, çmimet e naftës u rritën ndjeshëm, me naftën Brent që kaloi 113 dollarë për fuçi.