Sot u mbajt ceremonia mortore në nder të Servet Pëllumbit, ish-kryetar i Kuvendit, i cili ndërroi jetë një ditë më parë në moshën 89-vjeçare.
Ish-presidenti Bamir Topi mori pjesë në homazhe dhe dha një prononcim për mediat. Ai e vlerësoi Pëllumbin si një nga zërat më të ekuilibruar në politikë, veçanërisht brenda Partisë Socialiste. Topi e cilësoi profesorin si njeri reformator dhe një nga burrat më të mirë me të cilin ka bashkëpunuar në politikë.
Në deklaratën e tij, Topi u shpreh: «Dua të shpreh ngushëllime për familjen. Jam njohur me profesor Pëllumbin gjatë aktivitetit tim politik. Të jeni të siguritë se vjen si një bindje e brendshme dhe kontakte, ka qenë një nga zërat më të ekuilibruar, jo vetëm të politikës në përgjithësi, por brenda PS-së. Një njeri reformator. Ka shumë për të folur për profesor Pëllumbin. Është një nga burrat më të mirë që unë kam pasur rastin të bashkëpunoj në politikë!».
Ceremonia u zhvillua me pjesëmarrjen e figurave të ndryshme politike për të nderuar kontributin e Pëllumbit në politikën shqiptare.