Karateisti kosovar Islam Selmani ka arritur një rezultat të rëndësishëm në Lojërat Mesdhetare që po zhvillohen në Taranto të Italisë. Pas një paraqitjeje të suksesshme, Selmani u kualifikua në finale të kategorisë deri në 60 kilogramë, duke i siguruar Kosovës medaljen e shtatë në këtë edicion dhe medaljen e parë për sportin e karatesë.
Në rrugën drejt finales, Selmani shënoi fitore ndaj garuesit francez Sami Tas dhe qipriotit Andreas Gavriel. Në gjysmëfinale, ai mposhti grekun Christos Stefanos Xenos, duke siguruar kështu të paktën medaljen e argjendtë. Finalja ndaj kundërshtarit nga Turqia, Burak Ozdemir, është parashikuar të zhvillohet në orën 14:15. Pjesëmarrja e Selmanit në këto lojëra bëhet në kuadër të delegacionit të Kosovës, i cili përfaqësohet nga 163 sportistë në 21 disiplina sportive.
Përditësime
Islam Selmani fitoi medaljen e artë në karate, duke mposhtur në finale garuesin turk Burak Ozdemir. Ky sukses shënon medaljen e dytë të artë për Kosovën në Lojërat Mesdhetare Taranto 2026. Ky triumf shton bilancin e medaljeve të Kosovës, e cila tashmë numëron suksese të rëndësishme nga sportistë si Donjeta Sadiku, Laura Fazliu dhe Akil Gjakova.
Karateisti Islam Selmani siguroi medaljen e artë, pasi mposhti turkun Burak Ozdemir me rezultat 1:0. Selmani garoi i lënduar gjatë gjithë sfidave. Ai arriti në finale pas diskualifikimit të kundërshtarit qipriot, Andreas Gavriel, në çerekfinale dhe fitores bindëse 11:5 kundër grekut Christos Xenos në gjysmëfinale. Selmani ia dedikoi suksesin gjithë Kosovës, duke nënvizuar nivelin e lartë të kundërshtarit grek, i cili është medalist olimpik dhe kampion bote. Krahas suksesit të tij, në këto lojëra po marrin pjesë edhe sportistët Elmedina Istogu, Vlerë Qerimi, Betim Maliqi, Albulenë Gërvalla dhe Qëndresa Ibrahimi.