Autoritetet italiane kanë zhvilluar një operacion kundër trafikimit të lëndëve narkotike në zonën e Guidonias, ku është ndaluar dhe arrestuar një 29-vjeçar me origjinë shqiptare. Operacioni nisi pas vëzhgimeve të autoriteteve mbi lëvizjet e të riut pranë një ndërtese. Në momentin e ndalimit, ndërsa po ngarkonte disa valixhe në automjetin e tij, policia gjeti rreth 98 kilogramë kanabis.
Hetimet e mëtejshme u orientuan nga gjetja e një tufe çelësash në posedim të të arrestuarit, të cilët mundësuan kontrollin e disa ambienteve të përdorura si depo në Guidonia dhe Romë. Gjatë këtyre kontrolleve, përfshirë një garazh, policia zbuloi sasinë e mbetur të lëndës narkotike. Një pjesë e konsiderueshme e drogës ishte fshehur brenda frigoriferëve, të cilët ishin përshtatur posaçërisht për ruajtjen e saj.
Krahas lëndës narkotike, autoritetet sekuestruan materiale për paketimin e dozave, si dhe shënime të shkruara me dorë që përmbanin llogaritje dhe të dhëna lidhur me numërimin e drogës. Sasia totale e lëndës narkotike të sekuestruar në përfundim të operacionit kaloi 414 kilogramë, me një vlerë të përllogaritur prej mbi 4 milionë euro. Gjykata ka konfirmuar arrestimin e 29-vjeçarit dhe ka vendosur masën e sigurisë "arrest në burg" deri në përfundim të hetimeve.