Italia shprehu protestë zyrtare ndaj vendimit zviceran për lirimin me kusht të Jacques Moretti, pronarit të klubit në Crans-Montana, ku në orët e para të Vitit të Ri shpërtheu një zjarr që mori jetën e 40 personave dhe la 116 të plagosur.
Sipas agjencisë italiane ANSA, shuma prej 200 mijë frangash zviceranë si garanci u pagua nga një mik i afërt i Moretti-s, shtetas francez. Ndaj tij u vendosën masa kufizuese, si ndalimi i daljes nga vendi dhe detyrimi për t’u paraqitur çdo ditë në një stacion policie.
Në deklaratën zyrtare, qeveria italiane thekson se vendimi u mor nga autoritetet gjyqësore zvicerane pavarësisht seriozitetit të jashtëzakonshëm të veprës penale, barrës së rëndë të fajit, rrezikut të arratisjes dhe manipulimit të provave. Ky vendim, sipas Romës, hap sërish plagët e familjeve të viktimave dhe të atyre në trajtim spitalor.
Qeveria kërkon drejtësi dhe masa që respektojnë dhimbjen e familjeve. Kryeministrja Giorgia Meloni dhe ministri i Jashtëm Antonio Tajani thirrën në Romë ambasadorin italian në Zvicër për të koordinuar hapa të mëtejshëm. Ambasadori u udhëzua të kontaktojë menjëherë prokuroren e përgjithshme të Kantonit Valais, Béatrice Pilloud, për të përcjellë indinjatën e thellë të qeverisë italiane.
Tajani deklaroi se duhet kuptuar pse gjyqtarët e Sionit vendosën lirimin me kusht kundrejt garancisë financiare.