Italia do të rikthejë praninë e saj diplomatike dhe tregtare në Iran, pas mbylljes së përkohshme të misionit në fillim të muajit mars për arsye sigurie. Ministri i Jashtëm dhe zëvendëskryeministri italian, Antonio Tajani, bëri me dije në Parlament se rihapja e ambasadës do të shoqërohet edhe me funksionimin e plotë të zyrave të Agjencisë Italiane të Tregtisë (ICE).
Sipas autoriteteve italiane, ky hap shënon rifillimin e aktiviteteve diplomatike dhe ekonomike pas tensioneve të larta në rajon. Tajani e përshkroi mirëkuptimin e arritur midis Washingtonit dhe Teheranit si një zhvillim inkurajues për paqen. Ai theksoi gjithashtu rëndësinë e garantimit të lirisë së lundrimit në Ngushticën e Hormuzit, një çështje jetike për ekonominë italiane.
Marrëveshja kornizë për përfundimin e luftës u arrit këtë javë, pasi palët kishin dakordësuar më parë një armëpushim të përkohshëm në prill përmes ndërmjetësimit të Pakistanit. Nënshkrimi zyrtar i këtij memorandumi pritet të kryhet të premten në Zvicër, duke shënuar një pikë kthese në situatën gjeopolitike të rajonit.
Përditësime
Ministri i Jashtëm italian, Antonio Tajani, njoftoi sot se do të zhvillojë një bisedë me homologun e tij iranian, Abbas Araghchi. Me rastin e rihapjes së ambasadës italiane në Teheran, Tajani kërkoi angazhim për de-përshkallëzimin e tensioneve dhe forcimin e kanaleve diplomatike mes dy vendeve.
Në sfondin e rihapjes së Ambasadës italiane në Teheran, Qeveria italiane ka konfirmuar angazhimin në një mision ndërkombëtar detar. Operacioni synon garantimin e sigurisë së transportit tregtar në Ngushticën e Hormuzit, një arterie jetike për furnizimin global me energji.