Izraeli dhe Irani kanë kryer sulme të reja reciproke të premten, një ditë pasi Teherani goditi një rafineri nafte izraelite. Presidenti amerikan Donald Trump paralajmëroi Izraelin kundër sulmeve në një fushë gazi iranian të përbashkët me Katarin.
Ushtria izraelite ka thënë se ka goditur infrastrukturën e Iranit. Ndërkaq, Irani goditi Tel-Avivin, duke nxitur reagimin e sistemit të mbrojtjes ajrore izraelite. Më herët gjatë javës, Izraeli sulmoi fushat iraniane të gazit natyror, ndërsa Irani goditi kompleksin e gazit në Katar, duke përshkallëzuar konfliktin.
Lufta shpërtheu më 28 shkurt, kur Izraeli dhe Shtetet e Bashkuara të Amerikës sulmuan Iranin dhe vranë liderin suprem Ali Khamenei. Irani u përgjigj duke sulmuar Izraelin dhe bazat amerikane në rajon. Konflikti ka marrë jetën e mijëra njerëzve, shumica në Iran dhe Liban, por edhe në Lindjen e Mesme.
Sekretari i përgjithshëm i Organizatës së Kombeve të Bashkuara, Antonio Guterres, deklaroi se ka arsye të mjaftueshme për të besuar se të dyja palët kanë kryer krime lufte. “Nëse ka sulme qoftë në Iran apo nga Irani në infrastrukturën energjetike, mendoj se ka bazë të arsyeshme për të menduar se ato mund të përbëjnë krime lufte”, tha ai për "Politico". Ai shtoi: “Nuk shoh asnjë dallim. Nuk ka rëndësi kush i ka cak civilët. Është krejt e papranueshme”.
Lufta ka ndikuar në ekonominë botërore, duke ngritur çmimet e derivateve dhe duke çuar në shtrenjtim të produkteve të tjera.