Izraeli dhe Libani pritet të zhvillojnë raundin e dytë të bisedimeve në Washington të enjten, për të zgjatur armëpushimin aktual 10-ditor. Ky armëpushim hyri në fuqi më 16 prill dhe skadon më 26 prill.
Raundi i parë i negociatave në nivel ambasadorësh, të ndërmjetësuara nga Shtetet e Bashkuara, çoi në arritjen e këtij armëpushimi të përkohshëm. Delegacionet synojnë të shmangin përshkallëzimin e konfliktit, i cili u rikthye më 2 mars me sulme të Hezbollahut në mbështetje të Iranit.
Presidenti i Libanit, Joseph Aoun, deklaroi se bisedimet bazohen në objektiva kyç: ndalimin e plotë të agresioneve izraelite, tërheqjen e forcave izraelite nga territoret libaneze, kthimin e të burgosurve, vendosjen e ushtrisë libanez përgjatë kufijve ndërkombëtarë dhe nisjen e rindërtimit të zonave të prekura nga lufta.
Nga ana tjetër, ministri i Jashtëm izraelit, Gideon Sa’ar, i bëri thirrje qeverisë libanez bashkëpunim kundër Hezbollahut, të cilin e cilësoi si "shtet terrorist brenda territorit libanez". Ai theksoi se mes dy vendeve nuk ka mosmarrëveshje serioze dhe se bashkëpunimi është i nevojshëm për paqe afatgjatë.
Pavarësisht armëpushimit, palët kanë vazhduar me sulme sporadike. Izraeli mban kontroll në jug të Libanit deri në lumin Litani për të krijuar një zonë tampon, ndërsa Hezbollahu e kundërshton këtë prani. Në Liban ekzistojnë përçarje të brendshme, me qeverinë që kërkon çarmatimin e grupit dhe Hezbollahun që kritikon bisedimet.