Kryeministri i Izraelit, Benjamin Netanyahu, ka deklaruar se shteti i tij ka pezulluar sulmet ushtarake ndaj Iranit, duke theksuar se për momentin situata e zjarrit ka pushuar. Sipas Netanyahut, ky ndalim ka ardhur pasi regjimi në Teheran ka ndaluar sulmet ndaj territorit izraelit. Megjithatë, kreu i qeverisë izraelite paralajmëroi se, nëse Irani bën gabimin të sulmojë sërish, Izraeli do të ushtrojë të drejtën e vetëmbrojtjes me forcë të plotë.
Në deklaratën e tij, Netanyahu vlerësoi se si Irani ashtu edhe Hezbollahu në Liban janë aktualisht më të dobët se më parë, por situata rajonale mbetet e paqëndrueshme. Ai akuzoi Teheranin për përpjekje të krijimit të një "ekuacioni të ri", duke ndërlidhur konfliktin libanez me përgjigjen iraniane, një skenar që sipas tij nuk do të tolerohet gjatë mandatit të tij.
Sipas raportimeve të CNN, të cilat janë konfirmuar nga burime zyrtare, presidenti i Shteteve të Bashkuara të Amerikës, Donald Trump, i ka kërkuar Netanyahut të ndalojë nisjen e një sulmi hakmarrës. Udhëheqësit kanë zhvilluar dy biseda telefonike gjatë 24 orëve të fundit. Pavarësisht kësaj, Netanyahu sqaroi se ndalimi i operacioneve nuk nënkupton pranimin e një armëpushimi zyrtar, duke ruajtur të drejtën e Izraelit për të vepruar në mbrojtje të interesave të tij.