Një gjykatë në kantonin e Valais ka urdhëruar lirimin nga paraburgimi të Jacques Moretti-t, bashkëpronar i lokalit Le Constellation në vendpushimin e skive Crans Montana të Zvicrës. Ngjarja ndodhi natën e Vitit të Ri, ku humbën jetën 40 persona, kryesisht të rinj, dhe u plagosën 116 të tjerë.
Jacques Moretti ishte në paraburgim që nga data 9 janar, në kuadër të hetimeve për tragjedinë. Lirimi u mundësua pas pagesës së një garancie prej 215 mijë eurosh, ndërsa gjykata theksoi parimin e prezumimit të pafajësisë, sipas të cilit i dyshuari mbetet i lirë deri në përfundim të gjykimit, përveç rasteve me rrezik të lartë arratisjeje ose pengimi të hetimeve.
Ndaj Jacques Moretti-t dhe bashkëshortes së tij Jessica Moretti, e cila nuk ishte mbajtur në paraburgim, janë vendosur masa kufizuese:
- ndalimi i largimit nga Zvicra;
- dorëzimi i dokumenteve personale të identifikimit;
- paraqitja e përditshme në një stacion policie;
- pagesa e garancisë prej rreth 200 mijë frangash zviceranë.
Hetimet paraprake tregojnë se zjarri u shkaktua nga fishekzjarre të përdorura në ambiente të mbyllura, të cilat ndezën materialin izolues akustik në tavanin e bodrumit. Autoritetet po verifikojnë pajtueshmërinë e lokalit me rregullat e sigurisë dhe mbrojtjes nga zjarri, si dhe përgjegjësinë e pronarëve. Komuniteti i Crans Montana pranoi se nuk ka kryer kontrolle sigurie në ndërtesë që nga viti 2019.