Deputetja e zgjedhur e Lidhjes Demokratike të Kosovës (LDK), Janina Ymeri, ka reaguar lidhur me spekulimet për një marrëveshje të mundshme bashkëqeverisjeje ndërmjet kryeministrit në detyrë, Albin Kurti, dhe kryetarit të LDK-së, Lumir Abdixhiku.
Përmes një deklarate publike, Ymeri ka mohuar ekzistencën e çfarëdo dakordimi, duke vlerësuar se këto raportime nuk përkojnë me realitetin politik. Ajo theksoi se proceset për krijimin e koalicioneve nuk inicohen përmes titujve mediatikë, pavarësisht vijës editoriale të tyre.
"Koalicionet as nuk bëhen, as nuk inicohen nga titujt mediatikë, pavarësisht se nga cila media vijnë, qoftë e afërt me pushtetin ose jo", ka deklaruar Ymeri.
Në këtë kontekst, deputetja u ka bërë thirrje qytetarëve dhe votuesve që të tregohen të kujdesshëm dhe të mbështeten ekskluzivisht te njoftimet zyrtare të organeve drejtuese të LDK-së ose qëndrimet e deputetëve të saj.