Milani fitoi 1-0 ndaj Lecces në San Siro, me golin e shënuar nga Niclas Fullkrug. Skuadra mysafire u mbajt në lojë për një kohë të gjatë falë paraqitjes së portierit Falcone.
Pas ndeshjes, mesfushori shqiptar Ardon Jashari foli për DAZN. Ai u shpreh i kënaqur për besimin e trajnerit dhe për faktin se nisi si titullar.
“Le të vazhdojmë kështu. Jam i lumtur për Fullkrugun. Jam i kënaqur që e nisa ndeshjen si titullar, por gjëja më e rëndësishme janë tre pikët e ekipit”, tha Jashari.
Ai komentoi rolin e tij në fushë: “Unë bëj atë që më kërkon trajneri. Është e rëndësishme që shokët e ekipit të kuptojnë karakteristikat e mia. Më kërkoi të luaja si numër gjashtë dhe ky është një mesazh që duhet të përçohet në të gjithë ekipin”.
Jashari nuk kurseu fjalët e mira për bashkëlojtarin Luka Modrić: “Të luash me të është një dhuratë. Ai është një person i jashtëzakonshëm jashtë fushës dhe një lojtar i pabesueshëm. Po e shijoj çdo moment dhe shpresoj të luaj më shumë minuta përkrah tij”.
Pas kësaj fitoreje, Milani përqendrohet te ndeshja e radhës në Olimpico kundër Romës.