Zëvendëspresidenti i Shteteve të Bashkuara të Amerikës, JD Vance, ka sqaruar pozicionin e administratës Trump lidhur me marrëveshjen e paqes me Iranin. Në një deklaratë për rrjetin televiziv Fox News, ai theksoi se asnjë qindarkë e parave amerikane nuk do të jetë pjesë e këtij procesi.
Vance reagoi ndaj raportimeve për shuma të mëdha financiare, duke u shprehur se pretendimet për transferimin e 300 miliardë dollarëve apo 24 miliardë dollarëve janë të pavërteta dhe përbëjnë, sipas tij, propagandë iraniane. Ai theksoi se disa elemente brenda shoqërisë iraniane po përpiqen ta shesin këtë marrëveshje sa më pozitivisht për audiencën e tyre vendase.
Gjatë fjalës së tij, zëvendëspresidenti bëri edhe një krahasim me administratën e ish-presidentit Barack Obama, duke pretenduar se kjo e fundit i kishte dhënë Iranit mbi 1 miliard dollarë para të gatshme. Ndonëse përjashtoi mundësinë e përfshirjes së fondeve amerikane, Vance shtoi se mund të ketë përfitime për Iranin nëse ky i fundit përmbush detyrimet e parashikuara. Ai theksoi se vende të treta si Katari, Emiratet e Bashkuara Arabe ose Arabia Saudite mund të zgjedhin të investojnë në Iran nëse marrëveshja respektohet.