Trajneri portugez Jose Mourinho, i cili u rikthye në stolin e Real Madridit në fillim të muajit qershor, ka shprehur synimet e tij për afatin kalimtar të verës. Pas rizgjedhjes së presidentit Florentino Perez, klubi madrilen ka qenë aktiv në treg, duke zyrtarizuar afrimet e Marc Cucurellas nga Chelsea, Ibrahima Konates nga Liverpooli dhe Bernardo Silvës.
Sipas raportimeve të mediumit spanjoll Marca, Mourinho i ka kërkuar klubit të nisë përpjekjet për mesfushorin e Chelseat, Enzo Fernandez. Argjentinasi, i cili ka një kontratë me klubin londinez deri në vitin 2032, vlerësohet rreth 140 milionë euro. Megjithatë, burime pranë situatës, të cituara nga Daily Mail, bëjnë të ditur se deri në këtë fazë nuk ka pasur kontakte zyrtare midis Real Madridit dhe Chelseat.
Në listën e objektivave të madrilenëve figuron edhe mesfushori i West Hamit, Mateus Fernandes, për të cilin kanë shfaqur interesim edhe Tottenhami dhe Manchester Unitedi. Megjithatë, realizimi i transferimit të të dy futbollistëve në të njëjtën kohë konsiderohet si një skenar i vështirë. Ndërkohë, klubi mbetet i fokusuar edhe në çështjen e sulmuesit të Atletico Madridit, Julian Alvarez, për të cilin një ofertë prej 152 milionë eurosh u refuzua më herët nga klubi madrilen.