Juventus ndau pikët me Cagliarin në stadiumin "Unipol Domus", duke barazuar 1-1 në kuadër të javës së gjashtë të kampionatit italian. Vendasit, të drejtuar nga Fabio Pisacane, zhbllokuan rezultatin në minutën e 20-të, kur Daniel Maldini shënoi pas një pasimi të Paul Mendy.
Trajneri i Juventusit, Luciano Spalletti, ndërhyri në formacion në fillim të pjesës së dytë duke aktivizuar Edon Zhegrovën në vend të Francisco Conceicaos. Reprezentuesi i Kosovës u shfaq mjaft aktiv, duke vënë në provë disa herë portierin e Cagliarit, Elia Caprile. Pavarësisht presionit të shtuar, barazimi erdhi vetëm në minutën e 81-të, kur Randal Kolo Muani realizoi me kokë pas një krosimi. Në minutat e fundit, Kolo Muani pati mundësinë të përmbyste rezultatin, por goditja e tij përfundoi në traversë.
Në fund të ndeshjes, situata u tensionua dhe përfundoi me përjashtimin e trajnerëve të të dyja skuadrave. Luciano Spalletti dhe Fabio Pisacane u ndëshkuan me karton të kuq pas një konflikti verbal në fushë. Në një deklaratë për DAZN, Spalletti sqaroi se përplasja lindi si pasojë e akuzave të tij ndaj stafit të Cagliarit për humbje të qëllimshme të kohës.
Pas këtij rezultati, Cagliari mban 13 pikë në renditje, ndërsa Juventus pozicionohet në vendin e gjashtë me 11 pikë.
Përditësime
Trajnerët Luciano Spalletti dhe Fabio Pisacane u përjashtuan me karton të kuq pas një konflikti verbal lidhur me vonesat e qëllimshme gjatë ndeshjes.