Shefja e diplomacisë së Bashkimit Evropian, Kaja Kallas, ka vlerësuar përparimin e vendeve të Ballkanit Perëndimor në rrugën drejt integrimit evropian, duke veçuar Shqipërinë dhe Malin e Zi për hapat e rëndësishëm të ndërmarrë.
Në një intervistë për një agjenci lajmesh në Bosnje dhe Hercegovinë, Kallas u shpreh se zgjerimi i BE-së pritet të përshpejtohet, pasi mbetet një prioritet strategjik për sigurinë dhe stabilitetin e kontinentit. Sipas saj, Bashkimi Evropian ka kapacitetin e plotë për të pranuar këto vende, duke e cilësuar procesin si një interes të përbashkët.
“Zgjerimi nuk është një lojë me fitues dhe humbës. Ose të gjithë janë pjesë e tij, ose askush. Nëse marrim si shembull Malin e Zi ose Shqipërinë, ato janë vende që Bashkimi Evropian ka kapacitetin t’i mirëpresë. Ky është gjithmonë një proces i dyanshëm”, deklaroi Kallas. Ajo nënvizoi se reformat e qëndrueshme mbeten kyçe, duke paralajmëruar se dritarja e mundësisë për zgjerim nuk do të jetë e hapur pafundësisht.
Gjatë vizitës në rajon, Kallas trajtoi edhe situatën në Bosnje dhe Hercegovinë. Ajo rikonfirmoi mbështetjen për rolin stabilizues të misionit ndërkombëtar, ndërsa po punohet për gjetjen e një kandidati të fortë për postin e përfaqësuesit ndërkombëtar, me synim që vendi të funksionojë në të ardhmen pa mbikëqyrje ndërkombëtare.