Kaja Kallas, kryediplomatja e Bashkimit Evropian, foli në Konferencën e Sigurisë në Oslo më 2 shkurt 2026 për largimin gradual të Shteteve të Bashkuara nga Evropa.
Ajo vlerësoi se ky proces nuk lidhet vetëm me presidencën e Donald Trump, por ka nisur prej vitesh dhe reflekton konvergjencë në politikat e administratave amerikane.
"Largimi i SHBA-së nga Evropa është një proces afatgjatë. Nëse shohim politikën transatlantike dhe vendimet e administratave amerikane ndër vite, kjo nuk ka filluar me Presidentin Trump. Ka shumë konvergjencë në politikat e administratave të ndryshme", u shpreh Kallas.
Sipas saj, Evropa përballet me realitete të reja gjeopolitike për shkak të Rusias agresive dhe ndryshimit të aleancës transatlantike. Ajo paralajmëroi se ndryshimet nuk varen vetëm nga personalitete apo cikle zgjedhore, por përbëjnë prirje strategjike që kërkojnë reflektim dhe veprim nga BE-ja.
Kallas u ndal te rreziku i shtimit të interesit për armët bërthamore, që ka marrë hov pas luftës së Rusias kundër Ukrainës.
"Largimi nga mospërhapja ka filluar me luftën e Rusisë, sepse shumë vende panë se kërcënimi me armë bërthamore funksionon. Vende me oreks territorial mendojnë se duke pasur armë bërthamore mund të marrin atë që duan, ndërsa vendet që ndihen të kërcënuara nga fqinjët besojnë se kjo është e vetmja mënyrë për t’u mbrojtur", tha ajo.
"Për sa i përket rendit botëror, ky është një zhvillim jashtëzakonisht i rrezikshëm", përfundoi kryediplomatja e BE-së.