Kaja Kallas, Përfaqësuesja e Lartë për Politikë të Jashtme dhe Siguri e Bashkimit Europian, deklaroi se një takim mes kryeministrit të Kosovës Albin Kurti dhe presidentit të Serbisë Aleksandër Vuçiç mund të zhvillohet së shpejti. Kjo mundësi favorizohet nga vendimi i Kosovës për të përfshirë masa lehtësuese për serbët në Ligjin për të Huajt dhe atë për Automjete.
Megjithatë, rikthimi i të dy liderëve në të njëjtën tryezë vlerësohet i vështirë për shkak të zhvillimeve të fundit politike. Në Kosovë, Gjykata Kushtetuese pritet të sqarojë çështjen e zgjedhjes së presidentit, ndërsa një skenar i mundshëm mbeten zgjedhjet e reja. Në Serbi, kërkesat për zgjedhje vazhdojnë të dominojnë skenën politike.
Analisti Afrim Kasolli shprehet se këto dinamika do ta përcaktojnë mundësinë e takimit. Ai e konsideron të gabuar çdo nismë të tillë, sidomos pas sjelljeve të fundit të Serbisë. Sipas tij, Serbia po pajiset me raketa supersonike kineze, çka bie në kundërshtim me qëllimin e saj për të harmonizuar politikën e jashtme dhe të sigurisë me Bashkimin Europian.
Më parë, Albin Kurti kishte përcaktuar tre kushte për vazhdimin e dialogut me Serbinë, midis të cilave dorëzimi i Milan Radojeviçit, i akuzuar për organizimin e sulmit në Banjskë. Takimi i fundit mes Kurtit dhe Vuçiçit u mbajt në shtator 2023, pak ditë para këtij sulmi. Kasolli shton se tolerimet e vazhdueshme ndaj Serbisë e inkurajojnë atë të mbajë një politikë duale, duke bashkëpunuar me vendet lindore si Rusia dhe Kina, ndërsa përdor procesin e anëtarësimit në BE si kartë formale. Ai sugjeron që Kosova të kërkojë nga Bashkimi Europian një ndryshim qasjeje ndaj Serbisë.