Shaip Kamberi, deputet shqiptar në Parlamentin e Serbisë, ka uruar kryeministrin Albin Kurti për mandatin e ri si kryeministër i Kosovës dhe për përbërjen e re qeveritare.
Përmes një postimi në rrjetin social Facebook, Kamberi shprehu mbështetjen e tij dhe uroi që ky mandat të jetë i suksesshëm, i stabilizuar dhe me arritje konkrete për qytetarët e Kosovës.
Ai theksoi rëndësinë e forcimit të drejtësisë, zhvillimit ekonomik, rritjes së sigurisë dhe përshpejtimit të integrimit euro-atlantik.
Kamberi nënvizoi gjithashtu pritshmërinë që Qeveria e re ta vendosë çështjen e Luginës së Preshevës lart në agjendën e saj, përmes dialogut me Serbinë, bashkëpunimit rajonal dhe presionit ndërkombëtar për reciprocitet dhe simetri në respektimin e të drejtave të minoriteteve.
Në përfundim, ai uroi suksese ekzekutivit të ri dhe premtoi se pret që qeveria të punojë me vendosmëri për të gjithë shqiptarët, brenda dhe jashtë kufijve të Republikës së Kosovës.
Postimi i plotë:
“Urimet më të ngrohta për kryeministrin Albin Kurti dhe gjithë qeverinë e re! Qoftë ky mandat i suksesshëm, i stabilizuar dhe arritje për qytetarët e Kosovës, me drejtësi më të fortë, ekonomi më të zhvilluar, siguri më të lartë dhe integrim euro-atlantik më të shpejtë. Besoj që Qeveria e re do ta vendosë çështjen e Luginës së Preshevës lart në agjendën e saj përmes dialogut me Serbinë, bashkëpunimit rajonal dhe presionit ndërkombëtar për reciprocitet dhe simetri në respektimin e minoriteteve. Suksese qeverisë së re. Le të punojë me vendosmëri për të gjithë shqiptarët, brenda e jashtë kufijve të Republikës së Kosovës”.