Kampionati Botëror i futbollit 2026 filloi zyrtarisht këtë të enjte me një ceremoni spektakolare në stadiumin legjendar “Azteca” në Mexico City. Kjo është e para nga tri ceremonitë e planifikuara për vendet organizatore; pas Meksikës, festimet do të vazhdojnë në Kanada dhe Shtetet e Bashkuara të Amerikës.
Spektakli, i cili u ndoq nga më shumë se 87 mijë tifozë, solli në skenë emra të njohur të muzikës ndërkombëtare. Performanca kryesore u mbajt nga këngëtarja Shakira dhe artisti Burna Boy, të cilët interpretuan këngën zyrtare të turneut, “Dai Dai”. Pjesë e programit ishin gjithashtu artistë si J Balvin, Danny Ocean, Belinda, grupi Maná, Los Ángeles Azules, Lila Downs dhe këngëtari Alejandro Fernández, i cili interpretoi himnin kombëtar të Meksikës. Himnin e Afrikës së Jugut e interpretoi fituesja e çmimit “Grammy”, Tyla.
Organizimi i ceremonisë iu besua agjencisë milaneze Balich Wonder Studio, nën drejtimin e Marco Balich, duke përfshirë rreth 900 persona në realizimin e saj. Përkundër shqetësimeve për sigurinë në vend, forcat policore garantuan mbarëvajtjen e eventit brenda stadiumit.
Botërori 2026 shënon një rast historik si edicioni i parë që zhvillohet në tri shtete. Pas ceremonisë në Meksikë, aktivitete të ngjashme do të zhvillohen më 12 qershor në BMO Field të Torontos (Kanada) dhe në SoFi Stadium të Inglewood (SHBA).