Kandidatja për deputete e Listës Serbe, Jovana Radosavleviq, ka zhvilluar takime me përfaqësues të parlamentit zviceran në Bern. Ky aktivitet është mundësuar me mbështetjen e Ambasadës së Serbisë në Zvicër dhe ambasadorit serb Ivan Trifunoviq.
Gjatë këtyre takimeve, Radosavleviq ka paraqitur para parlamentarëve zviceranë pretendime lidhur me gjendjen e serbëve në Kosovë. Ajo është ankuar për atë që e cilësoi si presion institucional dhe sfida të sigurisë ndaj komunitetit serb. Ndër çështjet e ngritura prej saj ishin mbyllja e institucioneve të Serbisë në Kosovë, vonesat në themelimin e Bashkësisë së Komunave me Shumicë Serbe, si dhe shqetësimet për ruajtjen e identitetit serb, duke përfshirë rolin e Kishës Ortodokse Serbe.
Jovana Radosavleviq, e cila më parë ka drejtuar organizatën joqeveritare New Social Initiative, është e angazhuar politikisht me Listën Serbe, parti që ka kandiduar në zgjedhjet për Kuvendin e Kosovës. Në një fjalim të mbajtur më parë gjatë fushatës zgjedhore në Leposaviq, ajo bëri thirrje për sigurimin e 10 mandateve për Listën Serbe. Për shkak të këtyre qëndrimeve, ajo është kritikuar për përpjekje për bllokimin e pluralizmit politik brenda komunitetit serb në Kosovë, ndërsa veprimtaria e saj është ndërlidhur me ndikimin e Beogradit.