Ish-sulmuesi legjendar i Real Madridit, Karim Benzema, ka reaguar lidhur me kritikat e vazhdueshme që po i drejtohen Kylian Mbappes për paraqitjet e skuadrës spanjolle. Benzema e ka cilësuar të padrejtë situatën ku e gjithë përgjegjësia për vështirësitë e ekipit po i hidhet sulmuesit francez.
Në deklaratën e tij, Benzema theksoi se Mbappe po bën detyrën e tij duke shënuar gola dhe shtoi se problemet e Real Madridit janë më të gjera se performanca e një lojtari të vetëm. “Çdo ditë shoh njerëz që fajësojnë Mbappen për rënien e Real Madridit dhe sinqerisht nuk e kuptoj. Çfarë prisni që ai të bëjë? Ai është sulmues dhe po e bën punën e tij duke shënuar gola”, u shpreh ai.
Sipas Benzemas, është e pakuptimtë që të fajësohet vetëm sulmi kur skuadra përballet me probleme të tjera, siç është pësimi i golave të panevojshëm nga ana e mbrojtjes. Ai theksoi se futbolli është një sport kolektiv dhe se përqendrimi i kritikave te një individ i vetëm reflekton një këndvështrim të gabuar për këtë lojë.
“Ai realizon në sulm, ndërsa më pas mbrojtja pëson gola të lirë dhe të panevojshëm. Si mund të jetë Mbappe problemi? Kjo nuk ka aspak kuptim. Futbolli nuk është lojë e një lojtari. Nëse fajësoni vetëm Mbappen, atëherë duhet ta shikoni futbollin ndryshe”, përfundoi Benzema.