Kampionati i Kategorisë së Parë për sezonin futbollistik 2026–2027 nis të shtunën, më 5 shtator. Ky edicion synon të rrisë konkurrencën dhe të krijojë më shumë mundësi për skuadrat pjesëmarrëse që aspirojnë ngjitjen në Abissnet Superiore.
Sipas formatit të ri, kompeticioni do të zhvillohet në 3 faza, duke garantuar një sezon intensiv me një total prej 33 javësh. Struktura e re për përcaktimin e skuadrave që do të promovohen është si më poshtë:
• Dy skuadrat e para në klasifikimin përfundimtar do të sigurojnë ngjitjen direkte në elitë.
• Skuadra e tretë që do të ngjitet në Abissnet Superiore do të përcaktohet përmes një faze play-off, ku marrin pjesë ekipet e renditura në vendet 3, 4, 5 dhe 6 pas përfundimit të 33 javëve.
• Fituesi i finales së play-off-it do të fitojë të drejtën e promovimit në elitë.
• Për të përcaktuar skuadrën e katërt që do të promovohet, finalisti i dalë nga play-off-i do të përballet në një ndeshje vendimtare play-out me ekipin e renditur në vendin e tretë nga fundi të Abissnet Superiore.
Ky ndryshim në rregullore ka për qëllim forcimin e rivalitetit mes ekipeve dhe shtimin e mundësive për arritjen në elitën e futbollit shqiptar.