Policia e Kosovës ka ndaluar dhe arrestuar katër shtetas serbë në dy raste të veçanta të kalimit ilegal të kufirit në komunën e Gjilanit.
Rasti i parë është regjistruar më 14 shkurt 2026, rreth orës 10:40, në fshatin Pogragjë. Një njësi policore ka ndaluar një veturë me dy shtetas serbë, të cilët dyshohen se kishin hyrë në territorin e Kosovës përmes rrugëve ilegale. Pas intervistimit dhe vendimit të prokurorit, ata janë arrestuar dhe dërguar në mbajtje.
Rasti i dytë ka ndodhur po ashtu më 14 shkurt 2026, rreth orës 13:00, në fshatin Stublinë. Një njësi policore ka ndaluar një veturë me dy meshkuj serbë, të cilët dyshohen se kishin hyrë ilegalisht në Kosovë. Pas konsultimit me prokurorin, rasti është iniciuar dhe të dyshuarit janë dërguar në mbajtje.
Në të dy rastet, policia ka sekuestruar përkohësisht veturat dhe telefonat celularë të të dyshuarve. Hetimet janë në zhvillim e sipër.