Pas tre javësh nga mbajtja e votimeve, Zyra Kombëtare e Proceseve Zgjedhore (ONPE) në Peru ka shpallur rezultatet përfundimtare të raundit të dytë të zgjedhjeve presidenciale. Keiko Fujimori, udhëheqëse e partisë Fuerza Popular, është konfirmuar si fituese me një epërsi të ngushtë ndaj kandidatit të krahut të majtë, Roberto Sanchez.
Kjo fitore shënon rikthimin në pushtet të fujimorizmit, më shumë se dy dekada pas përfundimit të qeverisjes së babait të saj, Alberto Fujimori, i cili drejtoi vendin nga viti 1990 deri në vitin 2000.
Tensionet paszgjedhore
Procesi zgjedhor u shoqërua me paqartësi, pasi Roberto Sanchez, 57 vjeç, ka shprehur rezerva lidhur me rezultatin. Ai ka kërkuar anulimin e votave të diasporës, duke pretenduar për parregullsi. Si pasojë, në kryeqytetin Lima janë organizuar protesta nga mbështetësit e tij, të cilët i kanë bërë thirrje institucioneve ndërkombëtare të ndërhyjnë.
Zgjedhjet konsiderohen vendimtare për stabilitetin e vendit, i cili ka përjetuar ndryshime të shpeshta në krye të shtetit, me tetë presidentë të ndryshëm nga viti 2016 e deri më sot. Presidenti në detyrë, José María Balcázar, pritet të zhvillojë procedurat për dorëzimin e pushtetit pas certifikimit përfundimtar.