Pas ngjarjes së rëndë të ndodhur, Korporata Energjetike e Kosovës (KEK) ka njoftuar marrjen e masave të menjëhershme për forcimin e sigurisë dhe shëndetit në punë. Në një takim të jashtëzakonshëm të Bordit të Drejtorëve dhe Menaxhmentit, u vendos formimi i një Task Force për Sigurinë Industriale dhe Shëndetin në Punë, pjesë e së cilës do të jenë edhe ekspertë të jashtëm të fushës.
Detyra kryesore e kësaj Task Force do të jetë rishikimi i plotë i procedurave, standardeve dhe mekanizmave ekzistues të sigurisë, me synim identifikimin e mangësive dhe zbatimin e masave përmirësuese. Njëkohësisht, korporata sqaroi se procesi i vlerësimit të rrezikshmërisë së vendeve të punës, i kontraktuar gjatë këtij viti, aktualisht ndodhet në fazën e zbatimit dhe rezultatet e tij do të shërbejnë për reduktimin e rreziqeve.
Ndërkohë, hetimet lidhur me shkaqet dhe rrethanat e ngjarjes po vijojnë nga organet kompetente dhe ekspertët e forenzikës. Drejtuesit e KEK-ut theksuan se llogaridhënia për proceset e sigurisë do të shqyrtohet në të gjitha nivelet e korporatës, duke deklaruar se asnjë objektiv operacional apo prodhues nuk mund të ketë përparësi ndaj jetës dhe shëndetit të punëtorëve.