Belind Këlliçi, deputet i Partisë Demokratike, komentoi mbledhjen e Këshillit të Mandateve dhe Imunitetit të zhvilluar këtë të hënë për heqjen e imunitetit parlamentar të Belinda Balluku.
Sipas tij, SPAK paraqiti prova se dëshmitarët e përfshirë në dosjen e saj janë intimiduar dhe shantazhuar jo vetëm nga vetë Balluku, por edhe nga eksponentë të krimit të organizuar. Këlliçi vlerësoi se kjo tregon lidhje të drejtpërdrejtë të qeverisë me krimin e organizuar dhe përdorimin e investitorëve strategjikë për klientë të qeverisë, përfshirë persona në burg.
Në një intervistë për News 24, Këlliçi njofton se, bazuar në informacione informale, Edi Rama mund të thërrasë Asamblenë e PS-së brenda dy ditëve të ardhshme për të realizuar një "makiazh" në qeveri, ngjashëm me vitin 2017, kur hoqi Saimir Tahirin dhe 4-5 ministra të tjerë.
Ai specifikoi se Rama mund ta shkarkojë Belinda Ballukun nga posti i zëvendës kryeministres dhe ministres së Infrastrukturës dhe Energjisë, por duke mos zbatuar masën e SPAK-ut dhe duke i garantuar paprekshmërinë për sa kohë ai është kryeministër.