Drafti i propozuar nga mazhoranca për riorganizimin e ndarjes së re territoriale, i cili parashikon shkrirjen e 15 bashkive, ka hasur në kundërshtime të menjëhershme nga disa njësi vendore. Reforma përfshin ndryshime për 28 bashki, ndërsa 33 të tjera do të mbeten të pandryshuara, pa prekur ndarjen në qarqe. Sipas propozimit, qytetet me status të veçantë ligjor do të kenë një nënkryetar të dedikuar për koordinimin administrativ.
Në Bashkinë e Këlcyrës, anëtarët e Këshillit Bashkiak votuan unanimisht kundër draftit që synon bashkimin e saj me Bashkinë e Përmetit. Ky vendim erdhi si pasojë e reagimeve dhe protestave të banorëve, të cilët kundërshtojnë humbjen e statusit aktual. Këshilltarët, pavarësisht përkatësisë politike, i kanë bërë thirrje gjithashtu Këshillit Bashkiak të Përmetit që të mos e mbështesë këtë nismë.
Në Bashkinë e Klosit, ku drafti parashikon bashkimin me Bashkinë Mat, ka nisur një proces konsultimi publik. Kryetarja e kësaj bashkie, Valbona Kola, është rreshtuar në krah të qëndrimit të banorëve, duke deklaruar se do të zhvillohen dëgjesa publike në të gjitha njësitë administrative për një periudhë 60-ditore. Kola u shpreh se pozicioni i saj do të pasqyrojë vullnetin e popullit, duke theksuar se nuk do të mbështesë një vendim që bie ndesh me interesin e komunitetit. Këshilltarët bashkiakë në Klos kanë deklaruar gjithashtu se do të ndjekin të gjitha rrugët ligjore për ta kundërshtuar shkrirjen, duke mos përjashtuar as organizimin e protestave.