Kina ka konfirmuar për herë të parë se po zhvillon diskutime për një takim të mundshëm mes liderit kinez Xi Jinping, presidentit amerikan Donald Trump dhe presidentit rus Vladimir Putin. Zëdhënësja e Ministrisë së Jashtme kineze, Mao Ning, tha gjatë një konference për media në Pekin këtë javë se Kina është në komunikim me palët përkatëse për një takim mes tre krerëve të shteteve. Ende nuk është marrë vendim përfundimtar; takimi mund të mbahet këtë muaj në Shenzhen, në margjinat e samitit rajonal të Bashkëpunimit Ekonomik Azi-Paqësor (APEC).
Pekini pret samitin e këtij viti të APEC-ut, organizatë me 21 anëtarë, ku bëjnë pjesë edhe Shtetet e Bashkuara dhe Rusia. Trumpi pritet të udhëtojë drejt Shenzhenit për t’u takuar me Xi-në për herë të tretë këtë vit. Një nga synimet e takimit dypalësh do të ishte ruajtja e armëpushimit të brishtë tregtar mes SHBA-së dhe Kinës, i cili pritet të skadojë në janar.
Tensionet tregtare vazhdojnë. Përfaqësuesi amerikan për Tregtinë, Jamieson Greer, i kërkoi zëvendëskryeministrit kinez He Lifeng, gjatë një bisede me videolidhje të premten, që Pekini të ndërmarrë veprime konkrete për zbatimin e plotë të zotimeve të mëparshme. Kërkesa përfshinte blerjet e produkteve bujqësore, tokat e rralla dhe mineralet e tjera kritike. Sipas agjencisë kineze Xinhua, palët zhvilluan një shkëmbim të thelluar dhe konstruktiv, ndërsa Kina shprehu shqetësim për masat kufizuese ekonomike dhe tregtare të Uashingtonit ndaj Pekinit.
Trumpi ka thënë se do të ishte i interesuar të takohej me Xi-në dhe Putinin për të diskutuar kontrollin e armëve bërthamore. Ndërkaq, Putini është përqendruar te diskutimi i luftës në Ukrainë pa praninë e Kievit në tryezën e bisedimeve. Danny Russel, ish-zyrtar i lartë i Departamentit amerikan të Shtetit, tha se Rusia ka më shumë për të përfituar nga një takim trepalësh dhe se Moska po e shtyn përpara këtë ide. Ai shtoi se këshilltarët e Trumpit mund ta kenë paralajmëruar të shmangë Ukrainën si temë diskutimi.
Sun Yun, drejtoreshë e programit për Kinën në Qendrën Stimson, tha se takimi mund të mbahet, por se formati dhe përmbajtja mbeten të paqarta. Sipas saj, Rusia mund të përpiqet t’i afrojë Kinën dhe SHBA-në me qëndrimet e saj për Ukrainën, ndërsa Kina nuk pritet të përfshihet në bisedime për kontrollin e armëve ose për Ukrainën dhe Iranin. Ajo tha se sfida për Pekinin mund të jetë perceptimi që do të krijojë takimi dhe se samiti nuk duhet të barazohet me ndarjen e botës mes tri fuqive të mëdha.