Klisman Cake, mbrojtësi 26-vjeçar i Kombëtares Shqiptare, ka përfunduar bashkëpunimin katërvjeçar me KF Shkëndijën e Tetovës dhe është transferuar te Akhmat Grozny në Premierligën ruse të futbollit. Transferimi u realizua pas aktivizimit të klauzolës së largimit nga ana e klubit rus, që paguajti 400 mijë euro dhe mori në pronësi lojtarin.
Shkëndija bashkëpunoi për realizimin e transferit, duke përfituar një dëmshpërblim financiar, në respekt të dëshirës së futbollistit për një sfidë të re ndërkombëtare. Klubi e falënderon Caken për profesionalizmin dhe kontributin, duke theksuar historinë e besimit të ndërsjellë. Pas fitores së titullit kampion verën e kaluar, ai kishte mundësi të largohej si lojtar i lirë, por zgjodhi të rinovojë për një sezon tjetër.
Gjatë periudhës në Shkëndijë, nga janari 2022, Cake regjistroi 133 paraqitje zyrtare: 106 në kampionat, 3 në Kupë dhe 24 në garat evropiane, duke shënuar 12 gola. Ai u bë pjesë e gjeneratës historike që arriti fazën kryesore të UEFA Ligës së Konferencës.
Karriera e Cakes nisi te moshat e Tiranës, pastaj luajti dy sezone me ekipin e parë të bardhebluve (2017-2019). Më vonë kaloi te Struga për tre vite në Maqedoninë e Veriut, për t'u bashkuar më pas me Shkëndijën.
Debutimi me Kombëtaren Shqiptare ndodhi më 14 tetor 2025, në fitoren 4-2 kundër Jordanisë në miqësore, falë ftesës së trajnerit Sylvinho. Në Rusi, Cake do të luajë në të njëjtin kampionat ku aktivizohet shoku i tij i Kombëtares, Mirlind Daku, te Rubin Kazan.